Kunanka internet nishkataka maymi minishtirin. Chashnami wawakunapash paykunapa yachakunapa, ñukapash ñukapa ruranapami ima minishtishkakunataka chaypi maskani.
Chaywanka, hawallami imakunata yachay chayariklla kashka. Shinapash ñukamanta rimashpaka, chaypika manchay machaymi imakunata maskani. Mana llapina kashkata llapikpika imakuna rikurinllami, shunkupash pull pull niktami mancharini. ¿Kikinka manachu chashna llaki apashkanki?
Shinami kay punchakunaka, hatun llaktakunapi, maykan ñukanchik ayllu llaktakunapipash ña tiyan, kikin wasikunapipashmi ashtawan ashtawan ña tiyan.
Shinapash internet nishkaka kayna miercoles chishimi wasipi mana tiyarka. Ña shamunkami nirkanchik, shinapash chay chishi, tuta, jueves punchapash mana tiyarkachu. Chaymantami kayanapa wasiman rirkani.
Kayana wasika, kay Quitopi llaktapika, kaypi chaypimi tiyan, Quito umapi kakmanmi rirkani. Maypitak chay internet nishka mana tiyashkata allichichun mañana kani nishpami tapurkani. Rikuchirkami, maypi rimana kashkapika, mana ashtakachu karka, ishkaypa washapimi shayarirkani, kaymanta utiyallami llukshisha nishpami yuyakurkani.
Ñuka ñawpapi kakkunataka utiyallami paykunapa mañashkataka allichirka, shinami ñukaka shuk mishapa ñawpapi karkani, ñuka llakitami willakurkani, shinapash kunkayllami paypa computadora nishkapika mana imata ruray usharka. Chay ukucha nishkami wañurka. Kayman chayman kuyuchirka, ura hawapash kuyuchirka, ukuchaka wañushkami karka.
Mishaka mana imata ruray ushanichu nirka. Utiyalla ñuka llakita allichichun munakukpi, chashna tukukpika, ashataka piñanayarkami, ashataka llakinayarkami. Shinapash yanapankapakmi tukurkani. Chashnami mishataka ukuchapa waskata llukchishpa kutin churay nirkani, chashnami rurarka, shinapash mana ima rikurirkachu. Chayka computadora nishkata wañuchishpa kutin hapichichunmi mañarkani, shinapash mana wañurkachu. Chashna kakpimi, computadora nishkapa micha waskata aysachun mañarkani, chashnami micha illak sakirirka, chayka wañurkani. Kutinllatak hapichichunmi mañarkani. Kunanka chay ukucha nishkaka ñami alli karka. Tukuykunami kushikurkanchik.
Ñuka llakitami riksichirkani, payka uyarkanimi, ñukapa kayana yupaytami killkarka, 72 pachapimi allichishun nirka. Kimsa punchatami shuyana kani. Mana utiyallachu allichik kashka, mana kashpaka, ashtaka wakllishkachari tiyan, chaymantachari mana paktarin.
Kayta killka katikuk, ¿imata allichinkapak unayak kashkamantaka yuyanki? ¿Allichinkapak shamunkacha? Kunanka maypimi internet nishka tiyan, chaymanmi rina kani. Mana yankamantachu llukshina kani. ¿Shinami. Nachu? (O)
-------------------------------------------------------------------------------------------
Resumen traducido al castellano
Se fue el inter
Una noticia del jueves decía que más de la mitad de los ecuatorianos tienen acceso a internet de banda ancha. Brindo por ello, pero el miércoles en la tarde se fue, desapareció, se averió el inter (no sé cuál es el mejor término para expresar esa situación) de la casa. Imaginé que era momentáneo, pero no fue así. Amaneció jueves y ‘naranjas’. Así que no quedó más que ir a la institución estatal que provee de este servicio.
Lo bueno en primera instancia fue que no había mucha gente. Pregunté en dónde debía dar a conocer mi problema y me indicaron una isla, así llaman ahora al puesto que está en los patios interiores. Y navegué hasta allí, estuve detrás de dos. Todo fluía bien pero cuando me tocó exponer, se le dañó el ratón a la persona que atendía.
No soy experto en arreglar esto, así que guiado por simple lógica, pedí que desconecte y conecte nuevamente el ratón y nada; sugerí apagar y prender la computadora y ‘nanay’; finalmente mencioné que desenchufe y enchufe; esto sí dio resultado, el ratón ya funcionaba. Alegría ajena, no sé cómo es eso pero suena bien. Y ya pude dar a conocer mi problema, me pidió datos, los anotó y fríamente me dijo que se arreglará en próximas 72 horas y ‘siguiente’. Más lo que ayudé arreglar.
Estimado lector ¿ya ha pasado por esto? ¿Vendrán a arreglar? Porque hasta ahorita nadita de nada. Mientras tanto toca ir a sitios que ofrecen este servicio, entonces debo salir de casa, no es que sea callejero, por si acaso.
