Mana... Maymanta

- 13 de marzo de 2017 - 00:00

Kaynanik punchakunaka Súper Peguchepimi, Pawkar Raymi punchakuna, ashtaka takikkuna tiyarka.        

Maykankunami kay ayllu llaktamantaka shuk mama llaktakunaman llukshishka. Maykankuna may karumanmi rishka, shukkunaka kay Ecuador ukupi shuk llaktakunamanmi rishka. Kutin shukkunaka kikin ayllu llaktapimi sakirishka. Kay Pawkar Raymi punchakunami kikin ayllu llaktaman kutimushka. Wasita rikunkapak, aylluta rikunkapak, riksishkakunawan tantanakunkapakmi shamushka. Shuk mama llaktaman rishkakunakunaka, chaykunapi chiri killa kashkamantami kayman shamushka.

Pawkar Raymi punchakunami Súper Peguchepika shikan tantanakuykuna tiyarka, chaypimi shikan takikkunata rikunalla, uyanalla karka. Sarun watakunaka, kay raymipika, shuk markamanta, shuk mama llaktamanta takikkunatami apamuk karka.

Kay wataka mana chashnachu karka. Kay watapaka, kaymanta takikkunatami kayarka. Paykunatami kay punchakuna shikan tantanakuypi takichun chashna kayarka. Shinami ñukanchik ayllu llaktapi wirwilata, kuchunata, mandolinata, charangota, wankarta, flautata, quenata, sikusta, rontín, shuk imakunata takikkunaka tantanakurka.

Shamushkakuna, maykankunaka shuk mama llaktakunapika takishpami kullkin, maykankunaka awashkakunata katushpami kawsan.

Chashna shamushkakunami ayllu llaktapika shikan takikkunawan tantanakurka. Paykunami kay Pawkar Raymi punchakuna takirka.  

Yuyakpura, wanprapura, kuytsapurami tantanakurka. Paykunapa takishkaka allipachami uyarirka. Mishki mishkimi karka. Takikunaka rikunkapak rikkunatami sumakta tushuchirka. Shuk punchaka warmikunallami takirka, shuk punchaka tukuykunapami karka, kutin shuk punchaka wanprakunapallami karka.  

Shinami Súper Peguchepi ashtakapash, sumakpash takikkuna tiyashkata rikurkanchik. Takikkunaka karipash warmipashmi karka. Takinkapak tantanakushkapa shutikunapashmi uyanayay karka. Chashnami Aswa, Churay, SBRNS (Soberanos) feat, My way trip, Shairy Quimbo, Niyay, Warminsi, Quirquinchos, Samy, Humazapas, Tarpuy Samy, Peguche tiu, Tushuy Peguche, Ñawpak, Mana Maymanta, shuk shutikunapash uyarirka.

Tukuy chay tantanakushkamanta takikkunami Súper Peguchemanta karka. Shinami kay ayllu llaktapi alli takikkuna, sumak takikkuna tiyashkata rikurkanchik, rikuchichirkanchikpash. Shinapash maypipashmi Kichwa runakunaka may alli takikkuna kanchik, ¿nachu?  

Chashnami maykankunaka “Méxicoka Maná takikkunatami charin, kutin Pegucheka Mana… Maymantatami charin” nishpami killkarka.

Kayta killka katikuk, ¿Manachu kanpa ayllu llaktapipash alli takikkuna tiyan? Paykunatami riksichina kanchik, ima shina riksichinatami yuyana kanchik. ¿Manachu kanpash takinki? (O)

---------------------------------------------------------------------------------------------------------

Resumen traducido al castellano

Maná

En Súper Peguche, con motivo de las fiestas del carnaval, en lengua quichua Pawkar Raymi, este año se dio énfasis al talento local en música.

Sorprendente fue la participación de la comunidad. No sabía que habíamos tantos músicos, y de muy buena calidad.

Esos días de asueto fueron motivo, como todos los años, para el retorno de los que han migrado, muchos de los cuales tratan de compartir con sus familiares y disfrutar de un clima no tan frío como el invierno europeo.

Así, quienes permanecen en la comunidad con los que vinieron de visita conversaron, se organizaron y conformaron grupos musicales para estas fiestas, mientras que otros llegaron con sus bandas a mostrar los avances logrados en países lejanos, como Japón.

Espectacular e inolvidable fue escuchar, cantar y bailar en las canciones de los diversos músicos que hicieron presencia en las diferentes noches.

Fue impresionante la calidad de los grupos, tal es así que muchos señalaron: “Si México tiene a Maná, Súper Peguche tiene a Mana Maymanta”, nombre de uno de los conjuntos más aplaudidos. Y Mana Maymanta se traduce como ‘No de ningún lado’, obvio, de Súper Peguche.

Estimado lector, en su ambiente debe haber buenos músicos, ¿verdad? Habrá que hacer eventos para dar a conocer a esos talentos. ¡Cranee qué hacer! (O)

Lectura estimada:
Contiene: palabras
Visitas:
Enlace corto:
José Maldonado

Columnista invitado

Lo último de: José Maldonado